台語朗讀

 

臺灣閩南語朗讀文章選輯

 

註:以下的資料是參考鄭安住、林麗黛的研習講義所整理的

一、朗讀是啥物?

1、朗讀就是用清楚、正確、響亮佮有變化的聲音,共文章的內容誠有感

   情的表達出來,予聽眾會使透過你的朗讀來欣賞著文章的媠。

2、朗讀毋是干焦照文章來讀爾爾,應該愛真正確的表達原作者的想法佮

   作品的內容,予聽眾了解作者欲表達的思想是啥物,也就是對作品做

   動態的解說。

3、好的文章有藝術的力量,會當產生美感,嘛會使予咱著得智識。朗讀

   就是欲透過語調的變化佮表達,配合聲音的懸低、緊慢、強弱、輕重

   的變化,閣結合面部佮身軀的表演,鬥陣來表現朗讀的藝術性。

 

二、朗讀競賽評判標準佮比賽時間。

1、語音(發音佮聲調):占50%。

2、聲情(語調、語氣、語情):占40%。

3、儀態(儀容、態度、表情):占10%。

4、各組攏是4分鐘。

 

三、朗讀比賽欲有好成績的基本條件。

1、發音正確、音色好聽、咬字清楚。

2、外型愛媠、好笑神。

3、語文程度好,頭腦靈活,對台羅拼音熟悉。

4、有參賽的決心佮信心。

 

四、指導、訓練學生的重點。

1、對文章的用字、詞彙熟似了後才開始朗讀。

2、嚴格要求發音清楚正確袂重耽。

3、一定愛了解作者所欲表達的意思。

4、注意聲調懸下、緊慢的變化。

5、朗讀的語調愛自然,強弱、輕重愛拄好。

6、朗讀是規句規句,袂使一字一定來唸。

7、愛特別注意濁音、合脣音、入聲字、文白音佮變調的問題。

8、較長的文句愛斷句,停、接愛特別注意。

9、氣勢嘛愛注意,這是測驗朗讀者對文章的領悟佮熟似的程度。

10、忠於作者 ,袂使讀毋著、字落勾、烏白加字、減字、破詞、破句、

   重複字句。

11、愛讀了有感情,朗讀上重要的就是佇這个部分。

12、文章愛加讀幾遍,讀了非常的熟才會使去比賽。「捷講喙會順,捷做

   手袂鈍。」。

 

五、比賽的時陣愛注意的代誌。

1、提早到比賽的現場,證件愛紮去,較早去報到,共相關的資料證件領

   好了後,上好先啉一寡水,去便所一下,才袂佇袂開始比賽的時陣傷

   緊張欲放尿。

2、到比賽的教室了後,先共比賽的文章提起來讀幾遍,然後坐踮選手休

   息的所在等候。

3、猶袂到你抽題進前先欣賞別人的表現,無需要緊張一直讀稿,因為你

   應該對文章攏真熟矣才著,會使放予較輕鬆咧!

4、工作人員通知你去抽題的時,隨向前去工作席,抽著號碼,提著欲讀

   的文章了後,就緊去準備席準備,最後的準備時間有8分鐘,緊共抽著

   的文章閣讀幾遍。

5、前一號選手欲結束進前三十秒,閣啉一寡水,共心情放輕鬆。

6、前一號選手朗讀結束了後,莫著急欲上台,等工作人員叫你的時陣才

   慢慢仔peh起來,慢慢仔行去台頂。

7、先相好欲徛的所在,用45度的方向上台,文稿囥佇正手(抑是倒手攏

   會使),莫用雙手提,徛的所在是對中央彼个評判老師(一般會有三

   位),莫徛傷倚,嘛莫徛傷遠。

8、毋通傷著急欲開喙讀文章,先共評判老師佮觀眾相借問,表情愛自

   然,儘量莫緊張,向所有的人相借問,參考的台詞是:「各位評判先

   生,各位□□(選手、朋友、觀眾朋友)逐家好!」(註:是評判毋

   是評審,愛注意!),話講煞才誠心的行禮,鞠躬45度以上。行禮煞

   了後開始講:「我是第□號,今仔日我欲朗讀的是第□篇。」,這个

   時陣評判老師會開始掀in手--裡的文稿,等到所有的評判老師攏掀到

   彼篇文章了後才共文稿提起來讀,上好是囥佇肚臍遐的懸度,開始大

   聲共文章的題目佮作者的名讀--出-來,譬如是:「媽媽請你保重,陳

   恆嘉」。題目佮作者的名讀一擺就會使。

9、佇朗讀的時陣愛控制時間,段佮段之間停3秒,拄著句號停2秒,逗號

   停1秒,頓號毋免停,專心讀,毋免看評判先生佮觀眾,讀的時陣面愛

   有表情,頂半身會使振動,下半身袂使,愛有感情的讀--出來,若是

   有對話,無仝角色的講話愛特別改變情緒來讀,若是拄著引號(「」

   )內底的字定定是作者欲強調的所在,所以愛特別讀較重咧,若是一

   寡仔外來語抑是華語的詞,會使用原文抑是華語來讀無要緊。

10、4分鐘一睏仔就到,鈴仔聲若響起來,就愛隨停止讀,無需要硬欲共

   彼段讀完,直接講:「我的朗讀到遮結束,感謝逐家!」,講煞才閣

   行禮。

11、「徛予正才會得人疼。」,毋通曲痀、三角六肩,穿插愛正式,毋免

   化妝。

 

六、定定會讀毋著的音。

1、合脣音:敢(kám)講、審(sím)查、參(tsham)加。

2、鼻音:中央(ng)、黃(n̂g)色、雅(ngá)氣、五(ngóo)行。

3、濁音:麻()痺、茉(ba̍k)莉、捌(bat)貨、迷()信、台語()、

         研(gián)究。

4、in→im:原「因」→原「音」。

5、im→in:「金」仔→「巾」仔。

6、ing→in:「精」神→「真」神、「成」功→「神」功。

7、im→ing:「心」肝→「升」官。

8、入聲字的音袂使搝(giú)長,字尾是p、t、k、h要分清楚:

   練習(liān-si̍p)、威脅(ui-hia̍p)、筆尾(pit-bué)、

   催捒(tshui-sak)、褪腹裼(thǹg-pak-theh)。

 

七、愛注意連讀變調。

1、認同台灣。

2、淡江大學。

3、真煮食。

4、多謝逐家。

5、校長講明仔載免來學校。