台語演講

 

《台語演說愛注意的重點佮鋩角》

 

註:以下的資料是參考鄭安住的研習講義所整理

一、演說競賽評判標準佮比賽時間。

1、語音(聲、韻、調):占45%。

2、內容(見解、結構、詞彙):占45%。

3、台風(儀容、態度、表情):占10%。

4、時間:國小學生組、國中學生組4至5分鐘。高中學生組、社會組5至6

   分鐘。教育大學佮大學教育學院學生組、中學教師組、小學教師組7至

   8分鐘。超過抑是不足的時陣,每半分鐘扣分數1分,無到半分鐘,以

   半分鐘來算。

 

二、語音的部分。

1、因為語音占45%,所以上愛注意的就是發音一定愛「正確」(毋是

   「標準」,因為台語佮華語有誠大的無仝,華語有1个標準佇遐,毋過

   台語無,台語就是媠佇遮,台語的語音真多元,佇無仝的所在可能就

   有無仝的用詞佮發音,方音差就是台灣一種寶貴的語文資產)。

2、紲落去就是聲調,演講的聲調毋通自頭至尾攏柴柴,演講的時陣,聲

   調愛配合內容去做變化。歡喜的時陣,講話的速度愛較緊淡薄仔;若

   是悲傷、煩惱的時陣咧?因為佇悲傷抑是煩惱的時陣,你會想代誌,

   你會思考,因為你咧想,所以你的速度一定變慢,聲調嘛會較下,所

   以千萬毋通攏親像咧唸課文仝款。

3、演講的速度愛注意,毋通親像欲去趕火車仝款遐爾緊,這是毋好的代

   誌,評判老師會袂赴思考你所講的內容。演講的時陣若欲感動別人,

   就愛予人聽清楚你的內容,若是遐爾趕會予聽眾佮評判老師誠大的壓

   力,演講的效果就會出問題。

4、閣來就是聲音,演講的時陣,聲音愛響,表示你有把握、誠肯定、誠

   有自信。毋過愛特別注意,毋通傷大聲,若是傷大聲就會造成「

   」,予人聽起來誠袂爽快。

5、演講的時陣若是講到1个坎站,愛小可仔停一下,因為你講足濟物件,

   需要留一寡仔時間予聽眾去思考、吸收。毋過袂使停傷久、定定停,

   按呢顛倒會予人感覺你準備無夠,所以速度的控制嘛是一種技巧,啥

   物時陣愛停、啥物時陣毋通停傷久,攏愛配合講的內容去好好仔安

   排。

6、演講的時陣愛儘量自然,袂使有彼種「演講腔」,就是比賽所用的腔

   口,會予人聽了足袂慣勢。嘛袂使受著「演講」這个名詞的影響,想

   講「演」是欲去表演,其實這个「演」是演繹、推論,愛予人了解題

   目的意思是啥物、有啥物現象、愛按怎做,這才是演講的重點,毋是

   佇台仔頂表演一寡仔佮你的題目無關係的物件。

7、有一寡仔音,台語佮華語無仝款,像講「濁音」的「我」、「夯」

   枷、「囡」仔、「龍眼」、「搝」人客、「五」四三;「肉肉肉」、

   「目眉」、「萬」一、;「鼻音」的「甜」、「煎」茶;「合脣音」

   的「心」、「浸」水、「甘」甜;「入聲音」的二「十」、「彼」

   陣、練「習」,閣有文白音毋通烏白濫,「水滸傳」的水愛讀「suí

   ,毋通讀「tsuí」。

 

、 內容的部分。

1、演講的內容佮語音仝款,嘛占45%,稿的內容上好佮別人無相仝,因

   為題目攏無濟,1个題目攏有真濟人講著,若準寫的內容佮別人攏差不

   多,會予人聽起來感覺真普通、無特色,甚至真無聊,按呢就無法度

   有誠好的分數。譬如講用「感恩的心」來表達「食冰的滋味」,所表

   現出來的闊度就一定比其他顧食冰的人較闊,嘛較有深度,予人感覺

   誠特別,會予人更加認真去聽你的演講,分數自然就會較懸。

2、演講稿的內容愛配合比賽身分的人(國小、國中、高中、教師、社會

   組等)來寫,無仝的身分有無仝的生活世界佮見識,有無仝層次的想

   法,甚至有伊家己的語言,愛徛佇比賽者的角度來思考問題,毋通蹛

   佇台仔頂講一大堆比賽者無可能知影的代誌抑是人生大道理。

3、結構的部分,演講愛親像咧寫文章仝款,愛有「虎頭」、「象腹」、

   「豹尾」。拄仔開始講的時陣愛予對方了解你欲講的題目是啥物,

   「想予清、看予明、講予清楚」才有法度提懸分。「虎頭」就是愛共

   題目講予清清楚楚,親像虎的頭遮爾仔明顯;「象腹」的意思是講內

   容的面向愛闊,譬如講,有古早,有現代;有外國,有台灣;有學

   校,有家庭,予演講內容會當親像象的腹肚遐爾大,遐爾有內才;另

   外嘛愛有「豹尾」,就是講結尾愛有力,利用20秒的時間將演講內容

   作1个整理,予聽眾會當佇短短的時間將你演講的物件閣共組織起來,

   會當認同,甚至支持你的看法。

4、詞彙這部分,演講當中會當講出真正港有台灣味的語詞,像「窮分」

   、「懶屍」、「剾洗」、「橫直」、「糖霜丸」、「綿死綿爛」等,

   因為是參加語文競賽,一定愛發揮語文的特色,所以佇寫稿的時陣,

   儘量加寫寡正港的台語詞彙,按呢才有法度做好語文的傳承。

 

四、儀態的部分。

1、儀態占10分,上台演講愛表現出氣質、充滿自信。演講的時陣一定愛

   看聽眾,這是一種基本的禮貌。若是會當用面部的表情,尤其是目睭

   來加強演講內容,按呢會予聽眾閣較佮意。

2、毋通自頭至尾看天花板抑是塗跤,敢若足歹勢的款,這是無自信的表

   現,按呢較毋好。演講的時手勢嘛莫傷濟,因為是演講比賽,毋是參

   加手語比賽,手部的動作雖然會當加強演講的氣勢,毋過就親像煮物

   件仝款,加一寡仔味素,滋味會較好,加傷濟恐驚就對身體無好。千

   萬毋通佇台仔頂比手畫刀,親像是「保護三藏去取經→著猴」仝款,

   足無自然。

3、人講「好笑神得人疼,得人疼較好家己戇戇咧拍拚」,所以徛佇台仔

   頂毋通面漚面臭。逐家去比賽是去結緣,毋是去結冤仇,無必要激1个

   面腔。閣有,比的動作毋通自頭到尾攏仝款,若無,會予人看起來感

   覺真好笑。</