台語囡仔歌
◎〈白露〉 詞/林沉默 曲/洪瑞珍
十月白露凍草枝 草枝青青含愛意
見笑歹勢 暗喜尾欹欹
十月白露凍竹籬 竹籬珍珠掛胸衣
破腹等待 目睭金熠熠
十月白露凍紅柿 紅柿結子抹胭脂
無影無跡 風搖目屎滴
十月白露凍床墘 床墘思君沁心脾
茫茫怨怨 寒夜咬喙齒
◎〈冬節圓〉 詞/路寒袖 演唱/潘麗麗
小雪過了是大雪，大雪擱行著（到）冬至。
暗暝上介長，思念遠遠遠；
今年操煩夢中囥，醒來日頭曝眠床；
圓仔思念來煮湯，一碗親情燒擱軟。
冬至寒霜來叫門，叫咱明年早拍算；
過去毋免問，未來列（咧）發光；
共心早慢會相見，拍開彩霞半邊天。
冬至圓仔逐粒圓，明年定著是好年。
◎〈歲時歌〉施福珍
正月正，請囝婿，入大廳。 二月二，刣豬公，謝土地。
三月三，桃仔李仔伨頭擔。 四月四，桃仔來，李仔去。
五月五，龍船鼓，水裡渡。 六月六，踏水車，拍碌碡。
七月七，龍眼黑，石榴必。 八月八，勾豆藤，挽豆莢。
九月九，風吹，滿天哮。 十月十，冬瓜糖霜落餞盒。
十一月，年兜邊，人搓圓。 十二月，穿新衫，通過年。
◎〈電腦〉 石惠如/2002年行政院文建委員會【兒歌百首】徵選閩南語社會組優選
講到伊，真趣味，
四四角角像電視。
會寫字、會唸詩，
會唱歌、會扮戲，
嘛會曉 A B C。
講到伊，大人囝仔攏甲意。
◎〈露螺〉摘自巧兒文化實業有限公司《虎姑婆•囝仔歌學台語》
頭殼頂，兩支角，
軟軟袂相觸，
胛脊胼，揹厝殼，
上驚日頭曝。
◎〈露螺〉王金選
無腳會爬
無手會啉茶
有眠床
無棉被
有厝無土地
一間厝背咧戇戇旋
◎〈頭殼〉施福珍/傳統謎語改編
一個葫蘆七個孔，
一孔一孔黑弄弄，
兩孔會滴水，
兩孔會流膿，
另外一孔會歕風，
猶有二孔未震動，
三不五時做眠夢，
不知到底有若重？
【傳統歌謠】（開篇引韻）
◎門口一欉相思欉，相思病落唔知人。先生來看講無望，貼心來看好噹噹。
◎門前一欉相思樹，相思病倒藥難求。醫生來看講無救，搭心來看好溜溜。
◎火車卜行十八輪。行到車頭帶白煙。阿娘生媠毋免展。有人比你較少年。
◎火車火車吱吱叫。五點十分到枋橋。枋橋諸婦媠復俏。返來賣某予伊招。
◎火車欲行行鐵枝。十點五分到嘉義。娘仔生媠免揚氣。親像紅花會退時。
◎火車欲行行鐵枝。五點五分到嘉義。嘉義查某點胭脂。若欲嫁人來通知。
◎〈九如的火車路〉 康原
彼一年
阮來到高雄的港都
九如抑有一條鐵枝路
火車煙筒黑煙吐歸晡
細漢時
阮定定唱著
火車欲行行鐵枝
十點十分到嘉義………
◎〈火車到板橋〉 康原
火車咧行
吱吱叫
磅空行完過鐵橋
十點十分到板橋
火車欲行
吐黑煙
雲飛上天看袂僐
老人卡想嘛少年
◎〈火金姑〉傳統唸謠
火金姑，來吃茶，茶燒燒，配芎蕉，芎蕉冷冷，配龍眼，龍眼烏子核，吃菜來拜佛，拜幾拜？
拜三拜，豆干炒韭菜，韭菜炒腰子，夭壽囡仔吃欲死，吃欲落嘴齒。
火金姑，來吃茶，
茶燒燒，配芎蕉，
芎蕉冷冷，配龍眼，
龍眼烏子核，吃菜來拜佛。
1-2.◎〈拜佛〉傳統念謠改編/施福珍
大家做陣來拜佛，
拜幾拜？拜三拜，
豆干炒韭菜，
韭菜炒腰子，
吃到落嘴齒。
火金姑，來食茶，茶燒燒，食芎蕉，芎蕉冷冷，食龍眼，
龍眼愛剝殼，食那菝，那菝全全籽，食一下落嘴齒。
◎〈火金星〉施福珍
火金星，十五暝，請恁姨仔來食茶，茶米芳，茶米紅，央大妗做媒人，
媒人婆啊坐大轎，害彼咧囝婿大路搖，親家親姆驚一下，急甲雙腳勃勃趒。
◎〈秀才騎馬弄弄來〉 傳統念謠〈阿才〉改編/施福珍
秀才秀才騎馬弄弄來，
佇馬頂，跋落來，
跋一下，真厲害。
嘴齒痛，糊下頷。
目睭痛，糊目眉。
腹肚痛，糊肚臍。
嘿！真厲害。
◎〈大箍呆〉（合併二首傳統唸謠）
紅管獅，白目眉，
無人請，家已來；
來來！
大箍呆，炒韭菜，
燒燒一碗來，
冷冷阮無愛。
土豆仁，酥閣香，
豬肉炒油聰，
五月節，縛肉粽，
好吃叮噹。
◎〈彰化媽祖廟〉 康原
彰化俗語：
南門有媽祖宮
西門有蘭醫生
聽講 南門媽祖 真靈
數十年前
日本畫家佇媽祖宮頭前
畫出菜園佮樓仔厝宮
即馬 宮口已經改形
◎〈死鴨硬嘴巴〉施福珍（從諺語引申）
死鴨硬嘴巴，
斬頭揾沙茶，
吃落腹肚內，
漏到規褲底。